(ข) ยตฺถ วา ปน อวิชฺชานุสโย อนุเสติ ตตฺถ กามราคานุสโย จ…เป.… ภวราคานุสโย จ อนุเสนฺตีติ ?

รูปธาตุยา อรูปธาตุยา เอตฺถ อวิชฺชานุสโย จ มานานุสโย จ ทิฏฺฐานุสโย จ วิจิกิจฺฉานุสโย จ ภวราคานุสโย จ อนุเสนฺติ, โน จ ตตฺถ กามราคานุสโย จ ปฏิฆานุสโย จ อนุเสนฺติฯ กามธาตุยา ทฺวีสุ เวทนาสุ เอตฺถ อวิชฺชานุสโย จ กามราคานุสโย จ มานานุสโย จ ทิฏฺฐานุสโย จ วิจิกิจฺฉานุสโย จ อนุเสนฺติ, โน จ ตตฺถ ปฏิฆานุสโย จ ภวราคานุสโย จ อนุเสนฺติฯ ทุกฺขาย เวทนาย เอตฺถ อวิชฺชานุสโย จ ปฏิฆานุสโย จ ทิฏฺฐานุสโย จ วิจิกิจฺฉานุสโย จ อนุเสนฺติ, โน จ ตตฺถ กามราคานุสโย จ มานานุสโย จ ภวราคานุสโย จ อนุเสนฺติฯ (ฉกฺกมูลกํ)

(ค) อนุโลมปุคฺคโลกาสา

[25] (ก) ยสฺส ยตฺถ กามราคานุสโย อนุเสติ ตสฺส ตตฺถ ปฏิฆานุสโย อนุเสตีติ? โนฯ

(ข) ยสฺส วา ปน ยตฺถ ปฏิฆานุสโย อนุเสติ ตสฺส ตตฺถ กามราคานุสโย อนุเสตีติ? โนฯ

(ก) ยสฺส ยตฺถ กามราคานุสโย อนุเสติ ตสฺส ตตฺถ มานานุสโย อนุเสตีติ? อามนฺตาฯ

(ข) ยสฺส วา ปน ยตฺถ มานานุสโย อนุเสติ ตสฺส ตตฺถ กามราคานุสโย อนุเสตีติ?

อนาคามิสฺส กามธาตุยา ทฺวีสุ เวทนาสุ รูปธาตุยา อรูปธาตุยา ตสฺส ตตฺถ มานานุสโย อนุเสติ, โน จ ตสฺส ตตฺถ กามราคานุสโย อนุเสติฯ ติณฺณํ ปุคฺคลานํ รูปธาตุยา อรูปธาตุยา เตสํ ตตฺถ มานานุสโย อนุเสติ, โน จ เตสํ ตตฺถ กามราคานุสโย อนุเสติฯ เตสญฺเญว ปุคฺคลานํ กามธาตุยา ทฺวีสุ เวทนาสุ เตสํ ตตฺถ มานานุสโย จ อนุเสติ กามราคานุสโย จ อนุเสติฯ

ยสฺส ยตฺถ กามราคานุสโย อนุเสติ ตสฺส ตตฺถ ทิฏฺฐานุสโย…เป.… วิจิกิจฺฉานุสโย อนุเสตีติ?

ทฺวินฺนํ ปุคฺคลานํ กามธาตุยา ทฺวีสุ เวทนาสุ เตสํ ตตฺถ กามราคานุสโย อนุเสติ, โน จ เตสํ ตตฺถ วิจิกิจฺฉานุสโย อนุเสติฯ ปุถุชฺชนสฺส กามธาตุยา ทฺวีสุ เวทนาสุ ตสฺส ตตฺถ กามราคานุสโย จ อนุเสติ วิจิกิจฺฉานุสโย จ อนุเสติฯ

ยสฺส วา ปน ยตฺถ วิจิกิจฺฉานุสโย อนุเสติ ตสฺส ตตฺถ กามราคานุสโย อนุเสตีติ?